سامراجي سازشن جي باوجود روس تيزيءَ سان بدلجي پيو

روس جڏهن بالويشڪ انقلاب آندو ته دنيا جا اهي ملڪ جيڪي سرمائيدار هئا ۽ اهي ملڪ پڻ جن سدائين سامراجي ملڪن جي اوبر کاڌي هئي/آهي. هنن وٽ دنيا ۾ ڪوبه اوزار نه هو جيڪو هنن سوويت يونين جي خلاف استعمال نه ڪيو هو. سوويت يونين جي خلاف سامراجين اربين ڊالر پاڻيءَ جيان وهائي ڇڏيا. سموري دنيا کي ادب جي وسيلي ۽ ٻين طريقن وسيلي ڊيڄاريو ويو ته سوويت يونين ڪميونسٽ آهي ۽ اهو اسلام دشمن نظام آهي. سعودي عرب کان وٺي پاڪستان، ايران ۽ ٻين ملڪن تائين سوويت يونين جي خلاف اجايو زهر پکيڙيو ويو، پر دنيا ڏٺو ته سوويت يونين ڪنهن به مسلم ملڪ تي چڙهائي ڪري لکين مسلمانن جو اهڙي ريت قتل عام نه ڪيو، جهڙيءَ ريت اڄ تائين مسلمانن جا سڀ کان وڌيڪ جيڪڏهن ڪي قاتل آهن ته اهي سامراجي ملڪ ئي آهن، جن سوويت يونين کي مذهب جي خلاف استعمال ڪيو. جڏهن سوويت يونين جي پنهنجن ئي غدارن مير صادق گوربا چوف ۽ مير جعفر يلسن غداريون ڪيون ۽ سوويت يونين وکري ويو، دنيا ڏٺو ته ڪيتريون مسلم رياستون سوويت يونين کان الڳ ٿيون، پر ڇا روس انهن جي خلاف هڪ به گولي هلائي هئي؟ پر پوءِ به روس جي خلاف زهر اوڳاڇڻ جاري رهيو. روس ته هر انهيءَ ملڪ جي جاني توڙي مالي مدد ڪئي جتي استعماري قوتن ٻين ملڪن کي غلام بنائڻ ٿي چاهيو. سوويت يونين کي ته ٽوڙيو ويو، پر انهيءَ کي اڃان به وڌيڪ ٽوڙڻ ۽ ڪمزور ڪرڻ لاءِ اڄ به سامراجي قوتن جون ننڊون حرام آهن. سمورن سامراجي ناپاڪ ارادن جي باوجود روس وڌيڪ وکرڻ جي بجاءِ ڏينهون ڏينهن طاقتور ٿي رهيو آهي، جنهن جو سمورو ڪريڊٽ صدر ولاديمير پيوٽن جي محنتن ۽ اڻٿڪ جدوجهدن جو ثمر آهي. جنهن پنهنجي رات ڏينهن جي ڪوششن سان روس کي هڪ ڀيرو وري نئين طاقت ۾ بدلائي ڇڏيو آهي. جنهن جي خاص ڪري ڏيهي ۽ پرڏيهي پاليسين کي عالمي سياست ۾ هڪ مضبوط ۽ چٽي موقف جي طور تي ڏٺو پيو وڃي. هن هڪطرفي عالمي نظام کي چئلينج ڪندي هڪ متوازن ۽ گهڻ عالمي دنيا کي جوڙڻ ڏانهن قدم وڌايو آهي ۽ اهو اهڙو رخ آهي، جنهن کي تاريخ ۾ عالمي عدل جي قيام لاءِ بنيادي اهميت حاصل رهي آهي.

بين الاقوامي سطح تي روس جي پاليسي سدائين طاقتور رياستن جي جارحيت جي مقابلي ۾ ڪمزور قومن جي حمايت جي چوڌاري گهمندي رهي آهي. چاهي شام جو معاملو هجي، پوريشيائي خطي جي خود مختياري يا عالمي سطح تي طاقت جي غير منصفاڻي مٽاسٽا جي خلاف روس اصولي موقف اختيار ڪيو آهي. وقت جو رخ جڏهن به انهن واقعن جو جائزو وٺندو ته اها حقيقت نظرانداز نه ڪري سگهندو ته روس مظلومن سان گڌ بيٺو هو. جيستائين روسي معيشت جي باري ۾ واويلا ڪئي ويندي هئي ته اهو نظرانداز ڪيو وڃي ٿو ته روس هڪ اهڙو مالياتي ۽ واپاري پريشر ڀوڳي رهيو آهي، جيڪي سرمائيدراڻيون طاقتون ڪنهن به رياست کي معاشي طور تي ڪمزور ڪرڻ لاءِ استعمال ڪنديون آهن. ان جي باوجود روس پنهنجي پيدواري قوت، وسيلن ۽ علاقائي اتحاد (جيئن برڪس) کي مضبوط ڪندي عالمي معاشي ڍانچي ۾ پنهنجي خود مختيار پوزيشن برقرار رکي آهي، اهائي اهڙي اصولي مزاحمت آهي، جنهن جو اعتراف پاڻ عالمي مالياتي ادارا به ڪري رهيا آهن. اهو چوڻ غلط نه ٿيندو ته اڄ جي دنيا جي طاقتن جو توازن هڪ پاسي نه ٿي سگهيو ته ان جو هڪ وڏو سبب روس جي اها پاليسي آهي جيڪا عالمي سرمائيداراڻي بلاڪ جي مقابلي ۾ هڪ متبادل رستو پيش ڪري ٿي. اهوئي سبب آهي ته مارڪسسٽ نقطهءِ نظر جون مالڪ ڌريون روس کي سدائين قدر جي نگاهه سان ڏسن ٿيون، جي ان کي سوشلسٽ نظام ورثي ۾ مليو هجي يا اڄ هو رياستي مفادن جي بنياد تي فيصلا ڪري رهيو هجي، ليڪن طاقت جي ناجائز استعمال جي خلاف بيهي رهڻ هڪ بنيادي قدر آهي.

روس جا مخالف يقينن مختلف محاذن تي پريشر وڌائڻ جي ڪوشش ڪري رهيا آهن، پر حقيقتون ٻڌائين پيون ته هو سياسي ۽ سفارشي ميدان ۾ دفاعي پوزيشن تي وڃي چڪو آهي ۽ اچڻ وارو وقت ان ٽڪراءُ کي وڌيڪ چٽو ڪندو ته ڪير تاريخ جي درست پاسي ڏانهن هو. جهڙيءَ ريت اڄ چين کي بدنام ڪرڻ جي لاءِ سامراجي طاقتون اهو دهل وڄائي رهيون آهن ته چين ڪميونسٽ ناهي، بلڪه سامراجي سوچ جو مالڪ ملڪ بڻجي ويو آهي، پر اهڙي پروپيگنڊه جو اجايو داڦ هڻڻ کانسواءِ ڪجهه به ناهي. ڇو ته چين هن وقت مارڪسزم جي اصلي روح ڏانهن وڌي رهيو آهي ۽ مستقبل ۾ چين دنيا جي سپر طاقت ۾ تبديل ٿي ويندو. جهڙيءَ ريت ماضي ۾ سوويت يونين ۽ آمريڪا هوندا هئا.