اڄ پاڪستان جو عام شهري سخت ذهني مونجهاري ۾ ورتل آهي. سوشل ميڊيا، ٽي وي ٽاڪ شوز ۽ مختلف تجزين ماڻهن جي ذهنن ۾ سوالن جا انبار لڳائي ڇڏيا آهن. ڪو چوي ٿو ته بي ايل اي جي پٺيان ڀارت آهي، ڪو چوي ٿو ته ٽي ٽي پي افغانستان جي پيداوار آهي، پوءِ چيو وڃي ٿو ته افغانستان جي پٺيان ڀارت آهي، ڀارت جي پٺيان اسرائيل ۽ اسرائيل جي پٺيان آمريڪا. وري هڪ ٻيو جملو ٻڌڻ ۾ اچي ٿو ته آمريڪا ۽ پاڪستان پاڻ ۾ هڪ ٻئي جي اڳيان پٺيان آهن. اهڙي صورتحال ۾ عام ماڻهوءَ جو مونجهارو بلڪل فطري آهي. سوال اهو ناهي ته ڪير ڪنهن جي پٺيان آهي، اصل سوال هي آهي ته هن سڄي عالمي راند جو نقصان آخر ڀوڳي ڪير رهيو آهي؟ جواب بلڪل سادو آهي ته پاڪستان جو عام ماڻهو ان سڄي نقصان کي ڀوڳي رهيو آهي. بلوچستان ۾ حملا ٿين يا خيبر پختونخواهه ۾ بدامني، دهشتگرديءَ جو هر واقعو ڪنهن نه ڪنهن عالمي يا علاقائي طاقت جي مفادن سان ڳنڍيل نظر اچي ٿو، پر لاش هميشه پاڪستانين جا کڄن ٿا. اسڪول بند ٿين ٿا، بازار ويران ٿين ٿا، ماءُ پيءُ پنهنجن ٻارن جي مستقبل بابت خوف جو شڪار ٿي وڃن ٿا. حقيقت اها آهي ته دنيا هاڻي پراڪسي جنگين جي دور ۾ داخل ٿي چڪي آهي. وڏيون طاقتون سڌي جنگ بدران ڪمزور ملڪن اندر گروهن، تنظيمَن ۽ اندروني اختلافن کي استعمال ڪري پنهنجا مفاد حاصل ڪن ٿيون. پاڪستان جاگرافيائي لحاظ کان انتهائي حساس علائقي ۾ واقع آهي، تنهنڪري هر وڏي طاقت هتي پنهنجو اثر وڌائڻ چاهي ٿي.
