سنڌ ۾ ايسٽ انڊيا ڪمپني برداشت نه ڪنداسين، ڦٽن تي لوڻ ٻُرڪڻ ڪو وفاق کان سکي: مراد علي شاهه

سنڌ جي وڏي وزير مراد علي شاهه چيو آهي ته سنڌ ۾ ايسٽ انڊيا ڪمپني ٺاهي وئي ته سخت مزاحمت ڪنداسين. ڦٽن تي لوڻ ٻُرڪڻ ڪو وفاقي حڪومت کان سکي. رپورٽ موجب سنڌ جي وڏي وزير مراد علي شاهه پريس ڪانفرنس ڪندي چيو ته سنڌ سان ناانصافين جو ازالو ڪيو وڃي. هلندڙ مهيني وزيراعظم کي 6 صفحن تي ٻڌل خط لکيو جنهن ۾ ناانصافين جو ذڪر ڪيو ويو. سنڌ جي وڏي وزير چيو ته ٻه پاڪستان نه ٺاهيو. سنڌ ۾ ايسٽ انڊيا ڪمپني ٺاهي وئي ته مزاحمت ڪنداسين. سنڌ سان ناانصافين تي وزيراعظم کي خط لکيو، پر ڪجهه به نه ٿيو. ائين پيو لڳي ته ٻوڙن ماڻهن سان ڳالهائي رهيو آهيان. وڏي وزير چيو ته هي چون ٿا ته وفاق جي پئسن تي سنڌ کي حڪمراني ڪرڻ نه ڏينداسين. ملڪ جو 70 سيڪڙو پئسو سنڌ مان وڃي ٿو. سنڌ جي ماڻهن سان ان لاءِ ناانصافي ٿي رهي آهي ته هتان جي ماڻهن تحريڪ انصاف کي ووٽ نه ڏنا. ڇا اوهان چور ڌاڙيل چئي 5 سال گذاريندو؟ ڪم نه ڪندو. هن چيو ته وفاق طرفان اسان جا خدشا ختم ناهن ڪيا ويا. پنجاب، بلوچستان ۽ خيبر پختونخواهه ۾ ترقياتي ڪمن تي خوشي ٿي آهي. وفاق 7 مان 15 ارب رپين جا ترقياتي فنڊز وڌايا آهن. مراد علي شاهه چيو ته وفاق پنجاب جي لاءِ سنڌ کان وڌيڪ فنڊ ڏنا. ڪراچي، حيدرآباد موٽر وي جي معاملي تي سڀني کي خبر آهي. پنجاب ۽ ٻين صوبن ۾ ترقياتي ڪم ٿي رهيا آهن اسان کي به ترقياتي ڪمن لاءِ 25 سيڪڙو حصو ڏيو. هن چيو ته نيشنل اڪنامڪ ڪائونسل جا 3 ميمبر هوندا آهن ۽ آئين موجب سموري ملڪ مان 13 ماڻهو هوندا آهن. جنهن جا سال ۾ 2 اجلاس ٿيندا آهن، پر اهي وقت تي ناهن ٿيندا. سنڌ جي وڏي وزير چيو ته ڪراچي لاهور موٽر وي ٺهڻو هو، پر لاهور کان سکر تائين موٽر وي ٺاهيا ويا. روڊ نيٽ ورڪ بهتر هوندو آهي ته معيشت ۾ بهتري ايندي آهي. هن چيو ته 7 ڏهائي هڪ ارب رپيا نيشنل هاءِ وي جي لاڳت ٻڌائي وئي پر اسان جو ڪو به نئون پراجيڪٽ اين ايڇ اي ۾ناهي رکيو ويو. ڪوشش آهي ته اسان جو روڊ نيٽ ورڪ بهتر هجي. مراد علي شاهه چيو ته اسان هاڻ وفاق کي خط لکڻ ڇڏي ڏنو آهي. ڇو ته آخري خط ۾ لکيو هو ته شايد مان ٻوڙن ماڻهن سان ڳالهائي رهيو آهيان. سنڌ جي ماڻهن کي سزا ڏني پئي وڃي.