وزيراعظم جو آزاد ڪشمير ۾ فوجي جوانن جي شهادت تي ڏک جو اظهار
وزيراعظم شهباز شريف آزاد ڪشمير جي علائقي باغ ويجھو فوجي گاڏي سان پيش آيل حادثي تي ڏک جو اظهار ڪيو آهي. ذريعن موجب وزيراعظم شهباز شريف پنهنجي هڪ بيان ۾ حادثي ۾ شهيد ٿيندڙ 9 فوجي جوانن جي پونئرن سان همدردي جو اظهار ڪيو آهي. شهباز شريف چيو ته مادر وطن جي بچاءُ جو عظيم فرض نڀائيندي شهيد پٽن کي قوم سلام پيش ڪري ٿي. وزيراعظم شهيدن جي بلند درجات ۽ پونئرن لاءِ صبر ۽ حادثي ۾ زخمي ٿيندڙ جوانن جي صحتيابي لاءِ دعا ڪئي آهي. واضح رهي ته آزاد ڪشمير ۾ پاڪ فوج جي گاڏي سان حادثو پيش آيو جنهن ۾ 9 جوان شهيد ۽ 4 زخمي ٿي پيا. پاڪ فوج جي ترجمان اداري آءِ ايس پي آر موجب زخمين کي طبي امداد لاءِ سي ايم ايڇ راولپنڊي منتقل ڪيو ويو آهي.
