انتھائي افسوس آهي ته علي صفدر لفظن جو جادوگر احساسن جو جذبن جو خوبصورت شاعر اڄُ ھڪ موذي مرض ڪينسر ۾ مبتلا ٿي بستر ڀيڙو آھي ۽ مدد لاءِ واٽون نھاري رھيو آھي. سنڌي ادب ۾ هڪ منفرد مقام رکندڙ شاعر ناول نگار اديب ڪھاڻيڪار چئن ڪتابن: (1) ھوا کي ننڊ ناهي (شاعري) 2007ع. (2) مڌ جا رھيل رنگ (شاعري) 2010ع. (3) ماڻهو ھڪ جھنگل آ (ناول) 2017ع. (4) اي واءِ اسٽوڊيو (ناول) 2023ع)، ڪجھ گڏيل ڪتابن ۾ پڻ شامل مواد جو مالڪ ۽ ڪجھ اڻ ڇپيل ڪتابن جي مالڪ جيڪي ھن اڃان پنھنجي ھڙ ۾ سانڍي رکيا آھن، تن سمورين تخليقن جو مالڪ ايئن کڻي چئجي ته چار انمول ڪتاب سنڌيءَ ادب کي ارپيندڙ اڄ ڪينسر جهڙي موذي مرض سان وڙهي رهيو آهي. سندس تخليق ۾ جيڪو جذبو ۽ سچائي پڙھندي ھيل تائين ملي آهي، اهو ئي عزم کيس هن موذي مرض سان مقابلو ڪرڻ جي سگهه ڏئي رهيو آهي. ھن جون اکيون واٽ واجھائين ٿيون ڪلچر ڊپارٽمينٽ ۽ وسوارن کي اپيل ڪندس ته ھن جي وقت سر سار لھي سندس جيون بچايو ھو اھڙو ته نرالو تخليقڪار ذھن رکندڙ آھي جنھن نثر توڙي نظم ۾ پنھنجو مٽ پاڻ آھي، سندس ڪوبه مت ڀيد ناھي، ھو بلڪل الڳ ٿلڳ منفرد آھي سندس شعر ۽ شاعري مان اندازو لڳايو ته ھو ڇا آهي ھن جا حوصلا سندس لکڻين ۾ واضح چٽي ڇڏيا آھن، سندس ھر درد جي دوا ھن پنھنجي قلم کي سمجھي قلم کي ئي پنھنجو قل سرمايو سمجھي ننڍي وڏي مزدوري ڪري پنج سئو ھزار ڪمائي وقت گذاريو، پر سندس لکڻ ۾ احساسن جذبن کي پوئڻ ۾ ڪوبه گذارو ناھي ڪيو. سندس ھر خيال، غزل، گيت، وائي، بيت، ڪھاڻي تروينو ناول لاجواب کان لاجواب لکيا اٿائين جن کي پڙھندي ڌڙڪندڙ دل ڄڻ ته رڪجي وڃي ھڪ عجب ئي سرور من کي مدھوش ڪري ڇڏي ۽ ماڻھو سندس جي لکڻي يڪ ساھي پڙھي اچرج ۾ اچيو وڃن.
