عمران خان خلاف دهشتگردي ٽوڙ ايڪٽ تحت ڪيس داخل

اڳوڻي وزيراعظم عمران خان خلاف دهشتگردي ٽوڙ ايڪٽ تحت ڪيس داخل ڪيو ويو آهي. اسلام آباد جي مارگلا ٿاڻي ۾ اڳوڻي وزيراعظم خلاف ايف آءِ آر داخل ڪئي وئي آهي. عمران خان خلاف اينٽي ٽيررزم ايڪٽ تحت ايف آءِ آر داخل ڪئي وئي ۽ ڪيس ڊيوٽي مئجسٽريٽ جي فرياد تي داخل ڪيو ويو آهي. ڪيس ۾ سرڪاري آفيسرن کي ڌمڪائڻ ۽ ڪم کان روڪڻ وارا قلم شامل آهن. ڪيس جي متن موجب عمران خان ايف نائن پارڪ جلسي ۾ ايڊيشنل سيشن جج ۽ پوليس اهلڪارن کي ڌمڪيون ڏنيون ۽ سندس تقرير جو مقصد پوليس اختيارين ۽ عدليه کي ڊيڄارڻ هو. ايف آءِ آر جي متن ۾ چيو ويو آهي ته ڌمڪي جو مقصد پوليس آفيسرن ۽ عدليه کي پنهنجون قانوني ذميواريون پوريون ڪرڻ کان روڪڻ هو.