غربت ۽ مفلسي کان تنگ عورت پاران ڌيئرن سوڌو اجتماعي آپگهات جي ڪوشش
ملير ۾ گگهر ڦاٽڪ ويجهو هڪ بيواهه عورت غربت ۽ مفلسي کان تنگ اچي پنهنجي ٻن ڌيئرن کي زهر پيارڻ بعد پاڻ به زهر پي ڇڏيو. قادر نگر واسڻ نورجهان سومرو پهرين پنهنجي چئن سالن جي ڌيءَ حرا ۽ 6 سالن جي ڌيءَ صنم کي زهر پياريو. بعد ۾ نورجهان پاڻ به زهر پي ڇڏيو، عورت ۽ سندس ٻنهي ٻارڙين کي ڳڻتيءَ جوڳي حالت ۾ اسپتال منتقل ڪيو ويو. علائقي واسين موجب عورت جو مڙس فوت ٿي چڪو آهي، غربت ۽ مفلسي کان تنگ اچي هن ڌيئرن سميت اجتماعي آپگهات جي ڪوشش ڪئي.
