9 جنوري 2023 تي جنيوا ۾ ٿيل ڊونرز ڪانفرنس پاڪستان جي دوست ملڪن کي ان ڳالھ جي درخواست ڏني هئي ته اهي پاڪستان جهڙي غريب ملڪ جي موسمياتي چيلينجن کي منهن ڏيڻ لاءِ خاطر خواهه مدد ڪن ته جيئن پاڪستان جهڙن غريب ملڪن جون موسمي ڏمرن جي ڪري جيڪي معيشتون، زراعتون ۽ صنعتون تباھ ٿين ٿيون، انهن جي ٻيهر بحالي ممڪن ٿي سگهي. غريب ملڪ ۾ شهري توڙي ٻهراڙيءَ جي نظامن جي خرابي ۽ ڀُتي هجڻ جي ڪري ماڻهن جي زندگي آزار ۾ آهي، ڇو ته بارشون رڳو وسن نٿيون، پر تباهي مچائي پوءِ پاڻي وهائي ٿيون وڃن، جنهن جي ڪري عام ماڻهن جو مال متاع، گهر گهاٽ ۽ ٻار ٻچا لڙهي هليا ٿا وڃن ۽ رياست ۾ اهڙي سگهه نٿي هجي ته هو عام ماڻهن جي چڱائي ڪري سگهي يا انهن جي نظامن جي بحالي ڪري سگهي. گذريل نومبر ۾ ٿيل عالمي ڪانفرنس ان ڳالھ جي بهتري طرف هڪ راھ ۽ اشارو هئي ته هاڻي پاڪستان ان ڏس ۾ اڪليو ناهي ۽ اهي سڀ ملڪ پاڪستان جهڙن ٻين غريب ملڪن کي به جائز امداد جي آڇ ڪندا رهندا. اسان جهڙن ملڪن ۾ هڪ ڏچو ضرور آهي ته اهي هر سال ججهي مقدار ۾ بارشن جي ٿي پوڻ جي ڪري وري ٻيهر نظامن جون بحاليون نٿا ڪري سگهن. اسان جهڙا ٻيا ملڪ به آبهوا جي مطابقت سان پنهنجون زراعتون، صنعتون ۽ وري خراب ٿي پوندڙ معيشتون سنڀالي نٿا سگهن. گڏيل قومن جي اهڙي اجلاس (ڪانفرنس) ۾ هڪ دستاويز پيش ڪيو ويو هو ته جيئن اهي 20 امير ترين ملڪ انهن غريب ملڪن جي معيشتن جي بحالي جي لاءِ ڪم ڪري سگهن. ان پروگرام ۾ اهو به چيو ويو هو ته اهي 20 غريب ترين ملڪ جن ۾ آفريڪا جي ملڪن سميت افغانستان، بنگلاديش ۽ پاڪستان به شامل هئا، جن ۾ شديد بارشن کانپوءِ “رڪوري، ريهيبليٽيشن، ري ڪنسٽرڪش ۽ سسٽمز جي ريزيليئنس” ممڪن ڪري سگهجي، ان ڪري ته شهري توڙي ڳوٺاڻا سسٽم ايترا ته ڪمزور ٿين ٿا، جو اهي جيڪڏهن تيز بارشن جي نظر ٿي ٿا وڃن ته وري انهن جي بحالي مشڪل ٿي پوي ٿي ۽ بارشن کانپوءِ وبائن جي منهن ڪڍڻ جي ڳالھ وري ٻي هجي ٿي.
