آر بي او ڊي ٽو ۾ 4 ارب 40 ڪروڙن جو غبن، 16 آفيسرن تي ڪيس داخل
آر بي او ڊي ٽو جي رٽائرڊ چيف انجنيئر منور بوزدار سميت 16 آفيسرن خلاف 4 ارب 40 ڪروڙ رپين جي غبن جون 4 ايف آءِ آرز داخل ٿي ويون. ان حوالي سان اينٽي ڪرپشن اسٽيبلشمينٽ وڏي وزير مراد علي شاهه جي هدايت تي رائيٽ بينڪ آئوٽ فال ڊرين پراجيڪٽ 2 ۾ 16 ڄڻن خلاف چار ايف آءِ آرز داخل ڪيون ويون آهن. آر بي او ڊي ٽو منصوبو آر بي او ڊي ون کان منڇر ۽ سنڌو درياءَ سان ڳنڍڻ بجاءِ سمنڊ تائين پهچائڻو هو. منصوبو 2003ع ۾ 14 ارب رپين جي لاڳت سان شروع ٿيو، جيڪو بار بار روائيز ٿي 61 ارب 98 ڪروڙ رپين جو ٿي ويو، پر اهو اڃان تائين مڪمل نه ٿيو آهي. نومبر 2018ع ۾ منصوبي ۾ ڪرپشن بابت ڪجهه سينيئر انجنيئرن ريفرنس داخل ڪيو، جنهن تي وڏي وزير جي هدايت تي آبپاشي کاتي اپريل 2019ع ۾ انڪوائري ڪئي. جڏهن ته رٿابندي کاتي کانپوءِ معاملو اينٽي ڪرپشن کي اماڻي ڇڏيو. اينٽي ڪرپشن پنهنجي جاچ ۾ ڄاڻايو آهي ته فلڊ ورڪس جي نالي تي 4 ارب 48 ڪروڙ رپين جا جعلي بل ٺاهيا ويا آهن
