گذريل ڏينهن بنگلاديش جي خاص عدالت اڳوڻي وزيراعظم شيخ حسينه واجد کي انسانيت خلاف ڏوهن ۾ موت جي سزا ٻُڌائي ڇڏي. پرڏيهي ميڊيا موجب ڪيترن ئي مهينن کان هلندڙ ڪيس جو فيصلو ٻڌائيندي شيخ حسينه کي گذريل سال شاگردن جي اڳواڻيءَ ۾ ٿيل احتجاج تي ڪريڪ ڊائون جو حڪم ڏيڻ تي ڏوهي قرار ڏنو ويو ۽ کيس موت جي سزا ٻُڌائي وئي. عدالت ۾ ڪيس جي ٽن ملزمن مان صرف هڪ موجود هو. اڳوڻي آءِ جي پوليس چوڌري عبدالله المامون ڏوهه جي صحت قبول ڪئي هئي ۽ هو سلطاني شاهد بڻجي ويو. ڪيترن ئي مهينن تائين جاري رهندڙ ٽرائل ۾ پراسيڪيوشن جي دعويٰ رهي آهي ته شيخ حسينه واجد گذريل سال جولاءِ ۾ پنهنجي حڪومت خلاف شروع ٿيل مظاهرن دوران طاقت جو استعمال ڪندي انسانيت خلاف ڏوهه ڪيا. هلندڙ سال اڳوڻي وزيراعظم شيخ حسينه واجد جي فون جي هڪ اهڙي آڊيو جي تصديق ڪئي جنهن مان خبر پوي ٿي ته گذريل سال بنگلاديش ۾ شاگردن جي سربراهيءَ ۾ حڪومت مخالف مظاهرن خلاف سخت ڪريڪ ڊائون ڪرڻ جو حڪم هن ئي ڏنو هو. ان آڊيو ۾ جيڪو مارچ ۾ آن لائين ليڪ ٿي هئي، شيخ حسينه واجد کي اهو چوندي ٻُڌي سگهجي ٿو ته هو سيڪيورٽي فورسز کي اجازت ڏئي ٿي ته مظاهرن خلاف خطرناڪ هٿيار استعمال ڪيا وڃن جتي به کين ڏٺو وڃي ته گولي هنئي وڃي. ان رڪارڊنگ ۾ شيخ حسينه واجد کي هڪ سينيئر حڪومتي اهلڪار سان ڳالهائيندي ٻُڌي سگهجي ٿو، جيڪو هن وقت تائين سامهون ايندڙ سڀ کان اهم ثبوت آهي. هن حڪومت مخالف مظاهرن تي گولي هلائڻ جو حڪم ڏنو هو. بنگلاديش جي قومي ٽيليويزن تي سڌيءَ ريت نشر ٿيل ٻُڌڻيءَ ۾ جج غلام مرتضيٰ ڍاڪا جي ڀريل عدالت ۾ فيصلو پڙهي ٻُڌايو ته انسانيت خلاف ڏوهن جون سموريون گهرجون پوريون ٿي چڪيون آهن. ڪيس دوران پراسيڪيوٽر عدالت کي ٻُڌايو ته کيس ان ڳالهه جون شاهديون مليون آهن ته شيخ حسينه واجد جولاءِ ۽ آگسٽ 2024ع ۾ شاگردن جي اڳواڻيءَ ۾ احتجاج کي دٻائڻ لاءِ خطرناڪ هٿيار استعمال ڪرڻ جا سڌيءَ ريت حڪم ڏنا هئا. هڪ رپورٽ موجب 15 جولاءِ کان 5 آگسٽ 2024ع دوران احتجاج ۾ تقريبن 1400 ماڻهو قتل ۽ هزارين زخمي ٿيا، جن ۾ اڪثر سيڪيورٽي فورسز جي فائرنگ سبب متاثر ٿيا. شيخ حسينه واجد جي نمائندگي هڪ رياستي مقرر ڪيل وڪيل ڪئي جنهن عدالت کي ٻُڌايو ته هن تي لڳايل الزام بي بنياد آهن ۽ هن جي بريت جي درخواست ڪئي. 78 سالن جي شيخ حسينه واجد عدالت جي حڪمن جي ڀڃڪڙي ڪندي ڀارت مان واپس اچي ڪيس ۾ پيش ٿيڻ کان انڪار ڪيو هو. گذريل سال هڪ وڏي احتجاجي تحريڪ ۽ مظاهرن کانپوءِ شيخ حسينه واجد جو 15 سالن جو حڪمرانيءَ وارو دور ختم ٿيو ۽ هوءَ پاڙيسري ملڪ ڀارت هلي وئي هئي ۽ هاڻ اتي رهي ٿي. شيخ حسينه واجد کي ان انٽرنيشنل ڪرائيمز ٽربيونل نالي عدالت موت جي سزا ٻُڌائي جيڪو هن پاڻ قائم ڪيو هو. انٽرنيشنل ڪرائيمز ٽربيول (آءِ سي ٽي) 2010ع ۾ شيخ حسينه واجد جي عوامي ليگ جي حڪومت 1971ع جي جنگ دوران پيش ايندڙ ظلمن جي ذميدارن جو احتساب ڪرڻ لاءِ بڻايو ويو هو. شروعاتي سالن ۾ ان ٽربيول ڪيترن ئي اهم اڳواڻن خلاف ڪارروايون ڪيون، خاص ڪري بنگلاديش جي جماعت اسلامي، نيشنلسٽ پارٽي جي سينيئر سياستدانن کي جنگي ڏوهن ۾ سزا ٻُڌائي وئي، جن مان ڪجهه کي ڦاسي ڏني وئي. جڏهن ته عالمي انساني حقن جي تنظيمن ٽربيول تي نيوٽرل شاهدن جي کوٽ، تيز رفتار ڪاررواين ۽ سياسي انتقام جا الزام لڳايا. حسينه واجد جي حڪومت ان اعتراضن کي هميشه رد ڪيو. بنگلاديش جي برطرف وزيراعظم شيخ حسينه واجد پاڻ خلاف عدالتي فيصلي کان اڳ پنهنجي حامين لاءِ هڪ آڊيو پيغام جاري ڪئي هئي. هن پنهنجي پيغام ۾ چيو ته محمد يونس جي عارضي حڪومت عوامي ليگ کي چونڊن ۾ حصو وٺڻ کان روڪڻ چاهي ٿي. اڳوڻي وزيراعظم لڳايا ته سندس مٿان لڳايل الزام ڪوڙا آهن ۽ هوءَ اهڙن فيصلن جي پرواهه نٿي ڪري، عوامي ليگ هيٺئين سطح تي وجود ۾ آئي آهي ۽ هي اقتدار ڪنهن غاصب جي کيسي مان ناهي، سندس پارٽيءَ کي ختم ڪرڻ ايترو آسان ناهي. آڊيو پيغام ۾ هن نوبل انعام يافته محمد يونس ۽ ان جي حڪومت تي الزام لڳايا ته هو آئين جي ڀڃڪڙي ڪري چونڊيل نمائندن کي زبردستي هٽائڻ جي ڪوشش ڪري رهيو آهي. هن چيو ته عوام پاڻ انصاف ڪندو ۽ بنگلاديش کي صحيح رُخ تي آڻيندو. هن پنهنجي حامين کي خاطري ڪرائي ته عدالت جو فيصلو کيس روڪي نٿو سگهي ۽ چيو ته هوءَ پنهنجي ملڪ جي عوام لاءِ ڪم جاري رکندي. مون کي پريشان ٿيڻ جي ضرورت ناهي، مان زنده آهيان ۽ الله تعاليٰ مون کي زندگي ڏني آهي، اهوئي ان کي واپس وٺندو. هن انساني حقن جي ڀڃڪڙين جي الزامن کي رد ڪندي چيو ته هن 10 لک روهينگيا جي پناهگيرن کي تحفظ ڏنو ۽ هاڻ ان تي ان جي ابتڙ الزام لڳايا پيا وڃن. شيخ حسينه واجد حامين کي ٻُڌايو ته ماڻهو ان جي احتجاج جي سڏ تي فوري ردِ عمل ڏئي چڪا آهن ۽ عوام ان تي اعتماد جو اظهار ڪيو آهي. هن چيو ته هوءَ پنهنجي والدين، ڀيڻن ۽ ڀائرن کي وڃائي چڪي آهي ۽ ان جو گهر به ساڙيو ويو، پر هوءَ عوام جي ڀلائيءَ لاءِ ڪم جاري رکندي. شيخ حسينه واجد 1947ع ۾ اوڀر بنگال ۾ پيدا ٿي ۽ سياست ان جي رت ۾ وسيل آهي. هوءَ قوم پرست اڳواڻ شيخ مجيب الرحمان جي ڌيءَ آهي، جنهن کي بنگلاديش جو بنگله بنڌو يعني باباءِ قوم قرار ڏنو وڃي ٿو. سندس قيادت ۾ بنگلاديش پاڪستان کان ڌار ٿيو هو ۽ هو 1971ع ۾ ملڪ جو پهريون صدر بڻيو هو. ان وقت کان ئي شيخ حسينه واجد پاڻ کي ڍاڪا يونيورسٽيءَ ۾ هڪ شاگرد اڳواڻ طور مڃرايو هو. 1975ع ۾ فوجي بغاوت جي نتيجي ۾ شيخ مجيب الرحمان ۽ ان جي ڪٽنب جي ڪيترن ئي ماڻهن کي قتل ڪيو ويو هو ۽ ان حملي ۾ صرف شيخ حسينه واجد ۽ ان جي ننڍي ڀيڻ بچيون هيون، ڇاڪاڻ ته اهي ان وقت ملڪ ۾ نه هيون. هن ان دوران ڀارت ۾ جلاوطني اختيار ڪئي ۽ 1981ع ۾ بنگلاديش واپس موٽي ۽ پنهنجي والد جي پارٽي عوامي ليگ جي سربراهه مقرر ٿي وئي. هن جنرل حسين محمد ارشاد جي فوجي حڪومت دوران ٻين سياسي پارٽين سان گڏجي جمهوريت جي حمايت ۾ احتجاجي مظاهرا ڪيا. ان تحريڪ شيخ حسينه واجد کي مقبوليت جي بلنديءَ تي پهچائي ڇڏيو ۽ هوءَ هڪ قومي اڳواڻ طور اُڀري. هوءَ 1996ع ۾ پهريون ڀيرو ملڪ جي وزيراعظم بڻي.
