ڌرتي ڇا آھي؟ ڌرتي نظام شمسيءَ ۾ موجود ھڪ سيارو آھي جيڪو فاصليوار ترتيب ۾ سج کان ٽئين نمبر تي موجود آھي. ماپ جي لحاظ کان ڌرتي نظام شمسي ۾ پنجين نمبر تي وڏو سيارو آھي. ھن واحد سياري جي خوبصورتي اھا آھي ته ھن تي الله پاڪ پنھنجي جوڙيل خوبصورت مخلوق، انسان کي آباد ڪري سندس ضرورتون پوريون ڪرڻ لاءِ جانور، پکي، وڻ، ٻوٽا، معدنيات، ھوا ۽ پاڻيءَ جو پڻ بندوبست ڪيو. انسان کي اھو سمجھايو ويو ته ان نعمت کي صاف سٿرو رکي جيئن ھو الله پاڪ طرفان عطا ڪيل نعمتن جو ڀرپور فائدو حاصل ڪري سگھي. ڪئناڊا جي ھڪ فلاسفر “ھربرٽ مارشل مِڪ لوھان” جي چواڻي “ھن ڌرتيءَ تي ڪوبه مسافر نه آھي، اسان سڀ عملو آھيون.” جنھن جو مطلب آهي ته ھن ڌرتيءَ تي رھندڙ سڀني انسانن جي اھا ذميواري آهي ته ھو ڌرتيءَ جي سارسنڀال ڪن ۽ ھن کي گدلاڻ کان بچائين، پر ائين نه پيو ٿئي. آباديءَ ۾ بي تحاشا واڌ ۽ ان جي نتيجي ۾ پيدا ٿيندڙ ضرورتن جي حاصلات ھن ڌرتيءَ کي تمام گهڻو نقصان پهچائي رھي آھي. فيڪٽرين ۽ ٽرانسپورٽ مان خارج ٿيندڙ نقصانڪار دونھون، ٻيلن جي واڍي، پلاسٽڪ جو بيجا استعمال، پاڻ کي معتبر ثابت ڪرڻ لاءِ ٿيندڙ جنگيون ۽ اھڙن ٻين عملن سان ھن ڌرتيءَ کي تمام گھڻو نقصان رسيو آهي ۽ لڳاتار رسي رھيو آھي. چيو ويندو آهي ته ترقي خاموشيءَ سان نه ٿيندي آھي، ان لاءِ سڀني حصيدارن کي گڏ ٿيڻو پوندو آهي. ڌرتي کي بچائڻ لاءِ آلودگي گهٽائڻ، وسيلن، جن ۾ ڪوئلو، گيس، تيل ۽ ٻيون معدنيات وغيره شامل آهن، جي حفاظت ڪرڻ ۽ ماحولياتي نظام جي حفاظت لاءِ اجتماعي ڪارروائين جي اشد ضرورت آهي. اهم ڪارروائين ۾ سخت ۽ پاڻياٺي فضلي، ڪاربان ڊاءِ آڪسائيڊ ۽ ٻين گرين هائوس گيسن جي اخراج کي گهٽائڻ ۽ ٻيلن کي بچائڻ شامل آهي.
