اوڀر پاڪستان ٽٽڻ فوجي نه پر سياسي غلطي هئي: آرمي چيف جنرل قمر جاويد باجوا

جي ايڇ ڪيو ۾ يوم دفاع ۽ شهيدن جي حوالي سان تقريب ۾ آرمي چيف جنرل قمر جاويد باجوا خطاب ڪندي چيو ته هو آرمي چيف طور پنهنجو آخري خطاب ڪري رهيو آهي. پاڪ فوج جو بنيادي ڪم ملڪ جي جاگرافيائي حدن جي حفاظت ڪرڻ آهي، پر پاڪ فوج هميشه پنهنجي صلاحيت کان مٿانهون ٿي پنهنجي قوم جي خدمت ڪئي آهي، ريڪوڊڪ جو معاملو هجي يا ايف اي ٽي ايف جو نقصان، ملڪ کي وائيٽ لسٽ ۾ شامل ڪرڻ جو معاملو هجي يا فاٽا جو انضمام، سرحد تي خاردار تارون لڳائڻ يا گئس جي سستي فراهمي جو معاملو هجي، قطر هجي يا دوست ملڪن کان قرض وٺڻ، ڪورونا سان وڙهڻ هجي يا ماڪڙ جو خاتمو، ٻوڏ دوران امدادي ڪارروايون، فوج هميشه پنهنجي مينڊيٽ کان وڌيڪ قوم جي خدمت ڪئي آهي.

آرمي چيف چيو ته اڄ مان هڪ اهڙي موضوع تي به ڳالهائڻ چاهيان ٿو جنهن تي ماڻهو عام طور تي ڳالهائڻ کان پاسو ڪندا آهن ۽ اهو اوڀر پاڪستان جو ٽٽڻ وارو مامرو آهي. هن چيو ته اوڀر پاڪستان فوجي نه پر سياسي ناڪامي هئي، وڙهندڙ سپاهين جو انگ 92 هزار نه پر صرف 34 هزار هو، باقي مختلف سرڪاري کاتن جا ماڻهو هئا. مان سمجهان ٿو ته پاڪ فوج تي تنقيد جو ڪارڻ 70 سالن کان سياست جي مختلف شڪلين ۾ مداخلت آهي، جيڪا غير آئيني آهي، ان ڪري گذريل سال فيبروري ۾ فوج ڪافي غور ويچار کان پوءِ فيصلو ڪيو ته فوج ڪنهن به قسم جي سياسي مداخلت نه ڪندي.

هن چيو ته اسان جي آئيني عمل کي ڀليڪار ڪرڻ بدران ڪيترن ئي حلقن فوج تي سخت تنقيد ڪئي آهي ۽ انتهائي نامناسب ۽ سخت ٻولي استعمال ڪئي آهي.