نگرانيءَ ۾
ڪهاڻي
نگرانيءَ ۾
سعادت حسن منٽو
ترجمو: زاهده ابڙو
“الف” پنهنجي دوست “ب” کي پنهنجو هم مذهب ظاهر ڪري کيس سندس جڳهه تي پهچائڻ لاءِ مليٽري جي هڪ دستي سان گڏ روانو ٿيو…
رستي ۾ “ب” جنهن جو مذهب مصلحت طور تبديل ڪيو ويو هو، مليٽري وارن کان پڇيو، “سائين! اوسي پاسي ڪا واردات ته ناهي ٿي.”
جواب مليس- “ڪا خاص نه…… فلاڻي پاڙي ۾ البته هڪ ڪتو ماريو ويو آهي-”
“ب” ڊڄندي پڇيو- “ڪا ٻي خبر؟”
جواب مليو- “ڪا خاص ناهي….. نهر مان ٽن ڪتن جا لاش مليا آهن-”
“الف”، “ب” جي تسلي لاءِ مليٽري وارن کي چيو- “مليٽري ڪجهه انتظام نٿي ڪري-”
جواب مليو- “ڇو نه…. سڀ ڪم ان جي نگرانيءَ ۾ ئي ٿيندا آهن-”
(منٽو ڪي سئو افساني)
