بلبل پاڪستان نيره نور 71 ورهين جي ڄمار ۾ لاڏاڻو ڪري وئي

بلبل پاڪستان جي نالي سان مشهور پاڪستان جي ليجنڊ ڳائڻي نيره نور 71 ورهين جي ڄمار ۾ ڪراچي ۾ لاڏاڻو ڪري وئي. نيره نور جي خانداني ذريعن موجب هوءَ گذريل ڪجهه ڏينهن کان بيمار هئي ۽ ڪراچي جي هڪ اسپتال ۾ علاج هيٺ هئي. نيره نور جي جنازي نماز ڊفينس ۾ ادا ڪئي وئي. نيره نور جو منفرد آواز پاڪستاني موسيقيءَ جي سڃاڻپ آهي. 3 نومبر 1950ع تي ڀارتي رياست آسام جي شهر گوهاٽي ۾ جنم وٺندڙ نيره نور پاڪستان جي قيام کانپوءِ پنهنجي خاندان سان گڏ پاڪستان آئي ۽ ڪراچي ۾ اچي رهائش اختيار ڪئي. هوءَ شروعاتي ڏينهن ۾ بيگم اختر ۽ ڪنن ديوي جي ڳائڻ کان متاثر هئي ۽ جڏهن هن ريڊيو پاڪستان لاءِ ڳائڻ شروع ڪيو ته نيره نور لاهور جي نيشنل ڪاليج آف آرٽس ۾ شاگردياڻي هئي. نيره نور فيض احمد فيض جي ڪلام کي عوام تائين پهچائڻ ۾ اهم ڪردار ادا ڪيو، هن هميشه پنهنجي ڳائڻ لاءِ خوبصورت شاعري جي چونڊ ڪئي. بلبل پاڪستان ڪيترن ئي ٽي وي سيريلن لاءِ گيت پڻ ڳايا ۽ سندس ملي نغما پڻ تمام گهڻو مقبول ٿيا. کيس ڪيترن ئي قومي ايوارڊن سان پڻ نوازيو ويو.