اڄڪلهه سنڌ سميت سڄي ملڪ ۾ گرمي شدت اختيار ڪري چڪي آهي. گرميءَ جي موسم ۾ تيز اُس سبب انساني زندگي تمام گهڻي متاثر ٿي رهي آھي، پر تنهن هوندي به اسان جو پورهيت ۽ مزدور طبقو ان شدت جي گرمي ۽ هيٽ ويو واري صورتحال هئڻ باوجود پنهنجي ٻچن جو پيٽ پالڻ لاءِ نٽھڻ اُس ۾ به عام رواجي طور مزدوري ڪري رهيو آھي، جتي امير توڙي وچولي طبقي وارو انسان اهڙي نٽھڻ اُس ۾ گهر کان ٻاهر نڪرڻ به گوارا نه ڪندو، اتي اسان جو پورهيت مزدور ٻچڙن جو پيٽ پالڻ لاءِ نٽھڻ اُس ۾ به مزدوري ڪندي نظر اچي ٿو. نٽھڻ اُس هجي يا سخت سردي، مزدور ويچارو هر حال ۾ پورهيو ڪندي نظر اچي ٿو ۽ پورهئي کان نظر نٿو چورائي. جيڪڏهن ڏٺو وڃي ته اهو مزدور ۽ سندس محنت ئي آھي جيڪو ڪهڙي به تبديل ٿيندڙ موسمي حالاتن سبب مزدوري ڪندي سماجي ڪاروهنوار توڙي ملڪي تعمير ۽ ترقي ۾ اهم ڪردار ادا ڪري رهيو آھي. ڪنهن به شعبي ۾ نظر ڦيرائجي ته ان شعبي جي مزدور جي نه هئڻ سبب ڦيٿو ڦرڻ مشڪل نه، پر ناممڪن آھي، سرڪاري توڙي نجي ادارن ۾ به اهو مزدور ئي پاڻ ملهائي رهيو آھي ته ملڪ جي صنعت توڙي زراعت ۾ به اسان جي انهن مزدورن ۽ هارين جي محنت ۽ سندن پگهر شامل آھي، جو هن معاشري جو چرخو هلي رهيو آھي. هاڻي ڳالهه اها آھي ته موٽ ۾ مزدور ويچاري کي ملي ڇا رهيو آھي؟ اجرت جي صورت ۾ ڏهاڙي ايتري جو هن جي گهر جو گاڏو هلڻ به مشڪل ٿيو وڃي، جيڪڏهن ڪنهن بيماري يا ڪنهن ٻئي سبب هو مزدوري تان ناغو ڪري ٿو ته سندس ٻچا فاقا ڪاٽڻ تي مجبور ٿيو وڃن، يعني کيس ايتري به پڪ ڪونهي رهندي ته سڀاڻي هن جا ٻچا پيٽ ڀري ٻن وقتن جي ماني کائي به سگهندا يا نه…!
