ايم ڪيو ايم پاڪستان ۾ ڌڙا بندي ۽ لنڊن قيادت سان رابطي جو انڪشاف
ايم ڪيو ايم پاڪستان جي رڪن ايم اين اي سلمان مجاهد بلوچ کي پارٽي رڪنيت کان هٽائڻ کانپوءِ سندس پاران ايم ڪيو ايم ۾ ڌڙا هئڻ جو انڪشاف ڪيو ويو آهي. هن اهو به چيو ته ڊاڪٽر فاروق ستار جو هن وقت به لنڊن قيادت سان رابطو آهي. ايم ڪيو ايم پاڪستان پاران هن قسم جي الزامن جي ترديد ڪئي وئي آهي. هن قسم جون خبرون اڳ ۾ به گردش ۾ هيون جڏهن فيبروري جي مهيني ۾ ڊاڪٽر فاروق ستار، سون جي واپاري ڪامران شوري کي پارٽي ۾ شامل ڪيو ۽ ٿوري ئي عرصي ۾ هن کي پارٽي جي ڪوآرڊينيشن ڪاميٽي جو ميمبر بڻايو ويو هو، جنهن ڪيترن ئي ميمبرن کي پريان ڪري ڇڏيو. سلمان مجاهد بلوچ جي رڪنيت ختم ڪرڻ جو بنياد سندس اها وڊيو بڻي آهي جنهن ۾ هن عامر خان، فيصل سبزواري ۽ خواجه اظهار تي پارٽي ۾ هڪ الڳ ٽولو ٺاهڻ جو الزام هنيو هو.
