ممتاز مرزا جي 6 جنوري تي لاڏاڻي کانپوءِ اخبارن، رسالن ۾ جيترا ڪالم لکيا ويا، ريڊيو ۽ ٽي. وي تي جيترو مرزا صاحب جي زندگي تي پروگرام ٻڌايا ۽ ڏيکاريا ويا، اوترو شايد ڪنھن ملڪ جي مري ويل حڪمران تي به مڪالما، ڪالم، آرٽيڪل نه ڇپيا هوندا. سندس زندگي تي لکيل جيڪي مضمون منھنجي نظر مان گذريا آهن. انهن ۾ اڪثر مضمون نگارن مرزا صاحب جھڙي معروف شخصيت جي ڄمڻ جو سال مختلف لکيو آهي، ان ڪري مون اردو نامه نگار طارق عزيز شيخ ۽ لياقت راڄپر جي لکيل پروفائل کان علاوه جن ڪالم نگارن اڪثريت سان ڄمڻ جو سال لکيو آهي. مون ان تي عمل ڪندي اهو سال هيٺ لکيو آهي، منھنجو ريڊيو جي دنيا سان ٻارڙن جي ٻاري پروگرام کان وٺي محترم الاهي بخش ٻانڀڻ صاحب جي پروگرامن ۾ حصو وٺڻ تائين حيدرآباد ريڊيو اسٽيشن سان گھرو تعلق رهيو. ان دوران جڏهن ممتاز مرزا جو ذڪر نڪرندو هو ته سڀ سينئر توڙي جونيئر دوست مرزا صاحب جو نالو احترام سان وٺندا هئا. ٻي ڳالھه ته سنڌي ٻولي اٿارٽي جي اڳوڻي چيئرمين الانا صاحب جي ڪچھريءَ ۾ جڏهن به سنڌي ادب، ثقافت ۽ تاريخ جي حوالي سان خدمتون سرانجام ڏيندڙ شخصيتن جو ذڪر نڪرندو هو، تڏهن ممتاز مرزا جو نالو لازمي طور سامهون ايندو هو. ڇاڪاڻ ته هن سنڌي ادب ۽ فنونِ لطيفه ۾ هڪ گهڻ رخي شخصيت طور پنھنجو الڳ مقام ٺاهيو. هن سُھڻي شخصيت جو تعلق حيدرآباد جي قديم وسندي ٽنڊو آغا سان هو. سندس ابا ڏاڏا ارڙهين صديءَ ۾ سنڌ جي ٽالپر حڪمرانن جي درٻار سان لاڳاپيل رهيا، جتي انهن امير، مشير ۽ درباري شاعر طور خدمتون انجام ڏنيون.
