ڊسٽرڪٽ فوڊ ڪنٽرولرن کي ڪڻڪ خريداري جو هدف پورو ڪرڻ جو حڪم

سنڌ جي وڏي وزير جي هدايتن تي خوراڪ کاتي 14 لک ميٽرڪ ٽن ڪڻڪ جي خريداري جو هدف پورو ڪرڻ لاءِ ڊپٽي ڊائريڪٽرن ۽ ڊسٽرڪٽ فوڊ ڪنٽرولرن کي گهربل قدم کڻڻ لاءِ سخت حڪم جاري ڪري ڇڏيا آهن. خوراڪ کاتي جي سيڪريٽري لئيق احمد پاران جاري ڪيل خط ۾ ڊپٽي ڊائريڪٽر فوڊ ڪراچي، حيدرآباد، ميرپورخاص، سکر، لاڙڪاڻو، نوابشاهه ۽ سمورن ڊسٽرڪٽ فوڊ ڪنٽرولرن کي ڪڻڪ جي خريداري جو مقرر ڪيل هدف حاصل ڪرڻ جون ڪوششون تيز ڪرڻ جون هدايتون ڪيون ويون آهن. خط ۾ وڌيڪ چيو ويو آهي ته 26 مارچ تي ڪڻڪ جي خريداري جو عمل شروع ڪيو ويو هو، جڏهن ته آفيسرن جي ڪارڪردگي اطمينان جوڳي نه آهي، فقط 40 سيڪڙو هدف حاصل ٿي سگهيو آهي. وڏي وزير ڪابينا جي گڏجاڻي ۾ ڪڻڪ جي خريداري جو هدف پورو ڪرڻ لاءِ سخت حڪم ڏنا آهن