يوڪرين ۾ ناڪامي تي جوهري جنگ ٿي سگهي ٿي، روس جي وارننگ
روس خبردار ڪيو آهي ته يوڪرين جنگ ۾ ناڪامي ٿي ته جوهري جنگ ٿي سگهي ٿي. روس جي سيڪيورٽي ڪائونسل جي ڊپٽي چيئرمين ۽ اڳوڻي روسي صدر ديمرتي ميدادوف سوشل ميڊيا پوسٽ ۾ چيو آهي ته يوڪرين ۾ هلندڙ روايتي جنگ ۾ روس کي شڪست ٿي ته جوهري جنگ شروع ٿي سگهي ٿي. هن وڌيڪ چيو ته جوهري ملڪ اهڙن وڏن اختلافن ۾ شڪست برداشت ڪرڻ جوڳا نه هوندا آهن، جنهن تي سندن قسمت جو دارومدار هجي. جوهري جنگ بابت بيان روس جي پاليسي مطابق آهي. روس جو بيان ان وقت سامهون آيو آهي جڏهن آمريڪا يوڪرين لاءِ نئون فوجي سامان موڪلڻ جو اعلان ڪندي مغربي ساٿين تي زور ڏنو آهي ته اهي به جديد ٽينڪ ۽ ڳرا هٿيار يوڪرين کي فراهم ڪن. روس ان کان پهرين به ڪيترن ئي موقعن تي جوهري جنگ جي ڌمڪي ڏئي چڪو آهي.
