ڏکڻ ايشيا ڪيترن ئي ثقافتن، نسلن، ٻولين ۽ الهامي عقيدن جو گَھرُ رهيو آهي، ان ڪري هن خطي ۾ ماڻهن جا ايمان، مڃتا ۽ عقيدا به مختلف رهيا آهن، انهن ماڻهن جي نظر ۾ انهن جا اوائلي ۽ بنيادي عقيدا ئي سڀ ڪجھه آهن، ان ڪري ته اهي جيڪڏهن بنياد پرست ناهن ته اهي مذهب پرست به ناهن، اهي پوءِ ان اوائلي ۽ پراڻي عقيدي جا مڃيندڙ به ناهن. هر فرقي، مذهب ۽ عقيدي پرست ۽ فرقي پسند جي لاءِ اهو لازم آهي ته هو بنياد پرست ۽ بنياد پسند هجي نه ته ٻي صورت ۾ ان جا عقيدا ۽ ايمان ۽ مڃتائون ڪنهن ڪم جون ناهن، اهي مڃين ٿا ته جيڪي اهي مڃن ٿا، جن تي انهن جو عقيدو آهي، جن جي پويان اهي لڳل آهن، جي کي اهي پيش روا ۽ اڳواڻ سمجهن ٿا، انهن جا جيڪي سچا ڪوڙا آقا آهن، انهن جي روزي روٽي، علم، عقل، ڌن دولت، پُٽن، ڌيئرن ۽ گهڻ اولادن ۽ بختن جا دان ڪرڻ وارا، انهن جي قسمت جا وارث ۽ ڏيڻ ڪرڻ وارا به اهي ئي آهن، اهي سمجهن ٿا ته اهي ڌن دولتون ۽ راڄ ڀاڳ انهن آقائن جي مڃتا جي ڪري ئي ممڪن آهن، نه ته اهي هن ڌرتي جي گولي تي شايد باقي نه هجن ها يا انهن جا نسل پلجي نه سگهن ها، جي اهي ان ايمان ۽ عقيدي جي پٽڙي تان لهي وڃن. ان ڪري ممڪن آهي ته اهي ان راھ جا راهي ئي هجن ۽ اهي راهون ئي شايد انهن جي گناھ ثواب جا رستا به ليڪن ٿيون، ان ڪري ڪير ڪنهن کي سمجهائي ۽ سمجهي نٿو سگهي، پر انهن جو حال ڀائي ٿي سگهجي ٿو، انهن جي ڏک درد ۾ شامل هججي ۽ انهن سان سماجي رابطا به ڳنڍيل رکجن.
