ھند ۽ سنڌ ۾ مقبوليت رکندڙ تاريخي شڪارپور جيڪو برصغير ۾ خاص اهميت رکندو آهي، انھيءَ خاص اهميت رکندڙ ضلعي جو ھڪ خوبصورت حصو ميان جو ڳوٺ شھر به آھي، جنھن جو ھر ماڻھو صوفي صفت رکندڙ آھي. ميان جو ڳوٺ شھر فن تعمير جي حوالي سان پڻ اھميت رکندڙ آھي، جنھن ۾ عاليشان، عمارتون، حويليون، آشيانه، دريون، دروازا تاريخ جي سونھري وقت جي مختلف ڪھاڻين جو ڏس پتو ڏين ٿا جيڪو ھڪ ثقافتي ورثو آھي، ان ورثي جي اگر وڌيڪ کوجنا ڪجي ته ڪيترائي خزانا ضرور حاصل ٿيندا. ميان جي ڳوٺ جي زرخيز سر زمين تي ڪيترن ئي نامور ۽ انمول شخصيتن جنم ورتو جن ۾ شاعر، اديب، تعليمدان، گلوڪار، مصور وغيره شامل آهن، جيڪي دنيا ۾ پنھنجي ھڪ الڳ سڃاڻپ رکن ٿا، جيڪي تاريخ جي ورقن جي خزانن ۾ موجود آھن، ميان جي ڳوٺ جي سر زمين مان حاصل ٿيندڙ ڪنھن خزاني مان ملندڙ، ھڪ چمڪندڙ ۽ ٻرڪندڙ ھيري مثل صوفي طبيعت رکندڙ ذوالفقار علي رند به آھي جيڪو پيشي جي لحاظ کان مصور آھي.
ذوالفقار رند لاءِ سماجي روين جا اھي ناسور بڻيل لفظ ۽ پاڙي مان ماني ۽ چندو وٺي اچڻ وارو عمل ھڪ ڏکيو ۽ سخت عمل لڳو جنھن کي ان مڃڻ کان انڪار ڪيو، جنھن ان جي اندر کي جنجهوڙي ڇڏيو، ڇو جو ذوالفقار رند ڪڏھن به پاڻ کي جسماني معذور ۽ محتاج تصور نه ڪيو. ڇو جو مستقبل لاءِ ان جا فيصلا ۽ ارادا ڪجھ ڪرڻ لاءِ اٽل ھئا، ڪنھن جو محتاج ٿيڻ نه ھئا، انھيءَ ناسور بڻيل روين سبب مدرسي کي الوداع ڪيو. ذوالفقار رند ڪجهه وقت مال متاع به چاريا، مال چارڻ دوران ڌڪا ٿاٻا کائيندي زخمي به ٿيو. اسڪول پڙھائي دوران ذوالفقار رند کي ھڪ دوست ڊرائنگ جي ڪلاس ۾ وٺي ويو، جتي ٻين شاگردن کي ڊرائنگ ۽ آرٽ ڪندي ڏسي ھڪ نئين دنيا نظر آئي ۽ پاڻ به ڊرائنگ ڪرڻ لڳي ويو ۽ اسڪول کان بعد، واري وقت به ڊرائنگ ڪندو رھيو، ڊرائنگ ڪندي ڪندي ھڪ ڏينھن ذوالفقار رند پنھنجي اندر خدا طرفان عطا ڪيل ڪنھن خاص خاصيت کي محسوس ڪيو، اھا عطا ڪيل خاصيت تخقليقي صلاحيت ھئي، جنھن کي اجاگر ڪرڻ جي ڪوشش ڪرڻ لڳو، انھيءَ ڪوشش دوران پنھنجي اسڪول جي ڊرائنگ ٽيچر عبدالخالق چنا کان ڊارئنگ سکڻ لڳو ۽ گھري دلچسپي وٺڻ لڳو، انھيءَ گھري دلچسپي سبب اسڪول ڊرائنگ ٽيچر ان جي تخليقي صلاحيتن کي پرکي ورتو ۽ ان تي وڌيڪ ڌيان ڏيڻ شروع ڪيو.
ذوالفقار رند 2019 ۾ نيشل ڪاليج آف آرٽ مان فائن آرٽس جي ڊگري (منيئچر پينٽنگ) ۾ حاصل ڪئي، جنھن ۾ هن پاڻ سان پيش آيل ڏکائين ۽ مشڪلاتن واري احساسن کي پينٽ ڪري سماج آڏو پيش ڪيو، جنھن ۾ اسڪول ويندي ڪتن جي حملي ۾ زخمي ٿيڻ، ھلڻ گھمڻ دوران بار بار ڌڪا کائڻ، ٽنگون، ٻانھون ڀڄڻ وغيره شامل ھو.
