بجاراڻي-تيغاڻي خوني تڪرار جي جرڳي جو نوٽيس، ايس ايس پي شڪارپور کان رپورٽ طلب
ڊسٽرڪٽ اينڊ سيشن جج شڪارپور منومل کڳيجا جتوئي ھائوس تي ٿيل بجاراڻي-تيغاڻي خوني تڪرار جي جرڳي جو نوٽيس وٺي ڇڏيو. سيشن جج ايس ايس پي شڪارپور خالد مصطفيٰ ڪورائي کان جواب ۽ جرڳي جا تفصيل طلب ڪري ورتا. مقامي عدالت نوٽيس ۾ ڄاڻايو آهي ته سنڌ هاءِ ڪورٽ ڪراچي 2018 ۾ سختي سان حڪم جاري ڪيو ھو ته جرڳا غير آئيني ۽ غير قانوني آھن. ايس ايس پيز ۽ حد جا ايس ايڇ او پابند آھن ته جرڳا ڪندڙن خلاف قانوني ڪارروائي ڪئي ويندي ۽ جرڳا روڪرائڻ ۾ پوليس ڪردار ادا ڪندي. جج نوٽيس ۾ چيو ته جيڪڏھن ايس ايس پي يا حد جا آفيسر جرڳن خلاف قانوني ڪارروائي نه ٿا ڪن ته ھو آئين ۽ قانون جي ڀڃڪڙي ڪندڙ ليکبا ۽ ھنن خلاف سخت ڪارروائي ڪئي ويندي. ميڊيا جي خبرن مطابق گذريل ڏينھن شڪارپور جي جتوئي ھائوس تي بجاراڻي ۽ تيغاڻي ڌرين وچ ۾ ھلندڙ خوني تڪرار جي 46 قتلن جو جرڳو ڊاڪٽر محمد ابراھيم جتوئي جي سرپئنچي ۾ ٿيو آھي. ايس ايس پي شڪارپور کي جاري ڪيل نوٽيس ۾ ايس ايس پي شڪارپور خالد مصطفيٰ ڪورائي کي جرڳي جي تفصيلن سميت 3 ڏينھن اندر رپورٽ پيش ڪرڻ جو حڪم جاري ڪيو ويو.
