چانهه جي پتي جي قيمت مهانگي

بين الاقوامي طور ڊالر جي قيمت وڌڻ ۽ رپئي جي قيمت گهٽجڻ ڪري چانهه جي پتي جي واپارين پاران پتي جي قيمت ۾ في ڪلو 100 رپين تائين اضافو ڪيو ويو آهي. پاڪستان ٽي ايسوسئيشن جي چيئرمين خالد پوري پاران چيو ويو آهي ته کليل پتي جي قيمت ۾ صرف 20 کان 30 رپين جو اضافو ڪيو ويو آهي. جڏهن ته باقي 70 کان 80 رپيا اضافو هول سيل وارن ڪيو آهي. هن چيو ته بين الاقوامي مارڪيٽ ۾ رپئي جي قيمت گهٽجڻ سبب هي اضافو ڪيو ويو آهي. هن ٻڌايو ته هي اضافو ٻن ٽن مهينن کان بين الاقوامي مارڪيٽ ۾ ٿي رهيو آهي. جڏهن ته ملڪ ۾ قيمتن ۾ اضافو هاڻي ڪيو ويو آهي. واضح رهي ته چانهه جي پتي جي پيداوار ملڪ ۾ نه ٿيندي آهي جنهن ڪري اها پتي ٻاهران گهرائي ويندي آهي. سال 17-2016 ۾ ڪل 115372 ٽن پتي گهرائي وئي جنهن جي قيمت $340 ملين ڊالر هئي. جڏهن ته ملڪ ۾ چانهه جي پتي جي ڪل کپت 230000 ٽن ساليانه آهي. ملڪ ۾ وڪرو ٿيندڙ پتي جي ڪاروبار ۾ هڪ وڏو حصو اسمگل ٿيل پتي جو آهي جيڪو حڪومت جي ڪنٽرول کان ٻاهر آهي ۽ ان پاران قيمتن کي وڌائڻ به مشڪل آهي، جيڪا پتي ملڪ ۾ قانوني طريقي سان گهرائي وڃي ٿي ان تي سرڪار مختلف ٽيڪس وٺندي آهي، جنهن ۾ 10 سيڪڙو ڪسٽم ڊيوٽي، 17 سيڪڙو جي ايس ٽي، 3 سيڪڙو ٽيڪس شامل آهن. خالد پوري ٻڌايو ته ملڪ ۾ پتي جي ڪاروبار تي 36 سيڪڙو ٽيڪس هجڻ ڪري ئي ان ڪاروبار جو هڪ وڏو حصو غير قانوني طريقي سان ڪيو وڃي ٿو ۽ پتي اسمگلنگ ذريعي گهرائي وڃي ٿي.