هڪ اندازي موجب 2007 کان 2013 تائين ڌماڪن جو تعداد ٻيڻو هو، جيڪو 2001 کان 2005 تائين ايتري شدت ۽ گهڻائي وارو نه هو، ڇو ته لال مسجد واري آپريشن کانپوءِ ڪجھه مذهبي ڌريون اهي سڀ دهشت وارا ڪم ڪرڻ ۽ مڃڻ ۾ وڏيون اڳڀريون هيون، پر ان دوران هڪ اندازي موجب 100 کان وڌيڪ ماڻهن جي مارجي وڃڻ کانپوءِ حالتون وڌيڪ خراب ٿي ويون هيون، ڇو ته لال مسجد جي آپريشن کانپوءِ مذهبي گروھ افغانستان ۽ پاڪستان ۾ سي آءِ اي جي هجڻ تي جنرل مشرف ۽ افغان سرڪار تي ڪاوڙ جو اظهار ڪندا هئا، ان ڪري جو اهي ٻئي ڌريون انهن گروهن جي پٺڀرائي ڪنديون رهنديون هيون. توڻي جو سي آءِ اي جو وڏو ارادو ۽ هدف رڳو پاڪستان کي خوار خراب ڪرڻ ۽ غير مستحڪم ڪرڻ هو. حيرت اها به هئي ته فوجي حڪومت هوندي پاڪستان سرڪار کي آمريڪي امداد ملندي رهي هئي. ان ڳالھه کان به انڪار ناهي ته سي آءِ اي جو نواز شريف جي حڪومت ڪيرائڻ ۽ مشرف کي آڻڻ ۾ وڏو هٿ هو. وري ٻئي پاسي يو ايس جي امداد ۾ اسپتالون، قدرتي آفتن جي ذمري ۾ مددون، غريبن جي لاءِ امدادي پيڪيج وغيره ڏيڻ به هو، پر اتي ڊرون حملن ماڻهن جي مت کسي ورتي هئي، ان جي موٽ ۾ آمريڪا وارن جي اها ڳالھه هوندي هئي ته اهي پاڪستاني عوام جي گهڻي عزت ڪندا آهن، پر خطي ۾ ڪجھه اهڙا عناصر (طالبان) به آهن جيڪي پاڪستاني عوام سان گڏوگڏ عالم انسانيت جي لاءِ خطري جو باعث آهن، ان ڪري يو ايس جا اهي ڊرون حملا جائز هئا ۽ ان ڪري اهي جاري رهندا آيا ۽ سي آءِ اي پنهنجو ڪم ڪندي رهي. سي آءِ اي جو اهو به چوڻ هو ته ڊرون حملا ڪنهن به طرح پاڪستاني عوام تي ناهن، پر طالبان جي ٺڪاڻن تي ڪيا پيا وڃن، جيڪي پاڻ پاڪستاني عوام تي حملن جون تياريون ڪندا ٿا وتن، پر اهڙن حملن ته پاڪستاني عوام ۾ جون ننڊون حرام ڪري ڇڏيون هيون. ان جي ابتڙ سي آءِ اي ته 2005 واري ڪشمير جي زلزلي ۽ 2010 واري مها ٻوڏ ۾ ماڻهن جي سر زمين تي لهي مدد ڪئي هئي ته جيڪو غلط اثر هو ان کي زائل ڪري سگهجي ۽ پاڪستاني عوام آمريڪا لاءِ مثبت خيال پيدا ڪري سگهي، پر اها ڳالھه ايتري به مبهم نه هئي ته سي آءِ اي ملڪي ايٽمي هٿيار سوگها ڪرڻ ٿي چاهيا، انهن جي چرپر تي پابندي هڻڻ پئي چاهي. انهن آمريڪي سختين ۾ اهو ضرور هو ته اهي ملڪي ايٽمي هٿيارن جي چرپر گھٽ ۾ گھٽ سي آءِ اي جي ڏس پتي ۾ رکي هلن. ان ڳالھه تي کڻي پت به ڪيون ته سي آءِ اي جو ڪو تڪڙو پلان نه هو، پر اهو ضرور هو (۽ آهي) ته ڪنهن به طرح ايٽمي پروگرام جهڪو ڪن، پر بينظير صاحبه جي شهادت کانپوءِ سي آءِ اي ان ڳالھه تي زور ضرور ڏنو ته پاڪستان جو ايٽمي پروگرام خطري ۾ آهي. آمريڪين سميت مغربي دنيا کي اها ڳڻتي هئي ته طالبان جي قبضي ۾ جيڪڏهن اهو پروگرام اچي ويو ته پوءِ دنيا جو خير ناهي. “ايڊورڊ سنوورڊ” جي رپورٽ مطابق ته پاڪستان تي واشنگٽن طرفان اها پابندي آهي ته پاڪستان خطرناڪ هٿيار جو سيل (WMD) نٿو ٺاهي سگهي، جنهن سان اهي پاڪستاني ايٽمي اثاثن جي نگهباني ۽ نگراني ڪندا رهن. اهي پاڪستاني بجيٽ تي به اک رکندا هلن ۽ ڳجھا انگ اکر به جمع ڪندا رهن ٿا ته رياست ايٽمي هٿيارن جي حفاظت جي لاءِ ڪيتري بجيٽ مختص ڪري ٿي جنهن سان ايٽمي اثاثا محفوظ رهن.
