آمريڪي صدر ڊونلڊ ٽرمپ ٽن وڏين ايراني ايٽمي سائيٽن تي هڪ انتهائي ڪامياب حملي جو اعلان ڪيو ۽ دعويٰ ڪئي ته اهي سائيٽون مڪمل طور تي تباهه ٿي ويون آهن ۽ ايران جو ايٽمي پروگرام ڪيئي سال پٺتي هليو ويو آهي. ان کانپوءِ ايران قطر ۾ العديد بيس تي هڪ گڏيل حملو ڪيو، جنهن کانپوءِ آمريڪا جي ٽياڪڙيءَ ۾ تهران ۽ تل ابيب جي وچ ۾ جنگبندي ٿي، ائين هر طرف هڪ ٻئي تي فتح جي دعويٰ ڪئي وئي. هن هاءِ پروفائل اعلان کان صرف هڪ هفتو پوءِ، آمريڪي انٽيليجنس ليڪس هڪ بلڪل مختلف سچائي ظاهر ڪئي ته حملو پنهنجا اسٽريٽيجڪ مقصد حاصل ڪرڻ ۾ ناڪام ٿي ويو هو ۽ ايران جو ايٽمي پروگرام تباهه نه ٿي سگهيو، واشنگٽن ۽ تل ابيب جي دعوائن جي برعڪس بيان ٻڌي پوري دنيا حيرت ۾ پئجي وئي، پر ايران آمريڪا جي مڪاريءَ کان واقف هجڻ ڪري پنهنجي جستجوءَ ۾ “جيئن جو تيئن” رُڌل آهي. آمريڪي انٽيليجنس ليڪس جي ناقابل ترديد حقيقتن ۽ انڪشافن جي درستگي کانسواءِ، جن تي ٽرمپ ۽ سندس انتظاميا سوال اٿارڻ لاءِ وڏيون ڪوششون ڪيون آهن، اتي اهڙي معلومات آهي جيڪا ناقابل ترديد حقيقت سمجهي ويندي آهي، جنهن ۾پهرين حقيقت اها آهي ته ايران وٽ لڳ ڀڳ 408 ڪلوگرام افزوده يورينيم آهي جنهن جي خالصيت 60 سيڪڙو آهي، جنهن جي افزودگيءَ جي سطح کي 90 سيڪڙو تائين وڌايو وڃي ته اهو تقريبن 12 ايٽمي بم ٺاهڻ لاءِ ڪافي هوندو. ٻي حقيقت اها آهي ته ايران وٽ ڏهه هزار سينٽريفيوج آهن جيڪي افزودگيءَ جي عمل کي ڪجهه هفتن ۾ مڪمل ڪري سگهن ٿا. اهي سينٽريفيوج مڪمل طور تي ايران جا تعمير ڪيل آهن. ٽين حقيقت اها آهي ته ايران ڪيترن ئي مهينن کان افزودگي يا ايٽمي ٻارڻ جي پيداوار لاءِ اٺ نوان هنڌ ٺاهي رهيو آهي، جيڪي مڪمل ٿيڻ جي مختلف مرحلن ۾ آهن ۽ ڄاڻي واڻي انهن جي جڳهين کي ڳجهو رکيو ويو آهي. چوٿين حقيقت اها آهي ته انٽرنيشنل ائٽامڪ انرجي ايجنسي جي هڪ آفيسر اعلان ڪيو ته ڪجهه مهينا اڳ، ايراني اختيارين انهن کي الڳ ٿلڳ سهولت جي هيٺان هڪ خفيه جڳهه ڏانهن هدايت ڪئي، جيڪا 800 ميٽرن جي کوٽائي تي واقع آهي. سرنگن جي وڏي تعداد جي ڪري، انسپيڪٽر ان جي صحيح جڳهه جو تعين ڪرڻ ۾ ناڪام رهيا.
