ٽائٽينيم ڊزائن، طاقتور ڪئميرا، سي ٽائپ چارجر ۽ بهتر گيمنگ: آئي فون 15 ۾ ڇا نئون آهي؟
ايپل ڪمپني پنهنجي آئي فون سيريز جي نئين ماڊل ”آئي فون 15“ کي متعارف ڪرائي ڇڏيو آهي. ايپل مطابق ”آئي فون 15 پرو“ ۽ ”آئي فون 15 پروميڪس“ اهڙي ٽائٽينيم سان تيار ڪيون وينديون، جنهن سان خلائي گاڏيون تيار ڪيون وينديون آهن، جنهن جي نتيجي ۾ هي فون وزن ۾ هلڪو، پر انتهائي مضبوط هوندو. ايپل جي صارفين جي لاءِ هن ڀيري هڪ سٺي خبر اها به آهي ته ڪمپني مختلف ماڊلن جي قيمتن ۾ اضافي جي خبرن جي برعڪس آئي فون 15 جي قيمت ۾ ڪابه تبديلي ناهي ڪئي. آئي فون 15 جي قيمت 799 ڊالر، آئي فون 15 پلس جي قيمت 899 ڊالر ۽ آئي فون 15 پرو جي قيمت 999 ڊالر آهي. جڏهن ته فون جو سڀ کان مهانگو ماڊل آئي فون 15 پروميڪس 1199 آمريڪي ڊالرن ۾ دستياب هوندو. ايپل مطابق آئي فون 15 پرو ۽ آئي فون 15 پرو ميڪس چئن رنگن ۾ دستياب هوندو جنهن ۾ ڪارو، اڇو، نيرو ۽ قدرتي ٽائٽينيم رنگ شامل هوندا. هن نئين فون ۾ 48 ميگا پڪسل جو جديد ڪئميرا وارو نظام متعارف ڪرايو ويو آهي، جيڪو سمارٽ ايڇ ڊي آر ۽ بهتر ريزوليشن سان گڏ بهتر تصويرون ڇڪڻ ۽ رات جي وقت به سٺيون تصويرون ڇڪڻ ۾ مدد ڪري سگهندو. ٻئي پاسي آئي فون 15 پرو ميڪس ۾ ٽيلي فوٽو ڪيمره شامل ڪيو ويو آهي، ان ۾ هڪ نئون ايڪشن بٽڻ پڻ ڏنو ويو آهي. جڏهن ته ستن لينسن سان گڏ ڪئميرا اڃا وڌيڪ بهتر ڪم ڪندي. نئين فون ۾ ٻي خاص ڳالهه اها آهي ته ان ۾ سيٽلائٽ ذريعي اضافي سفري سهولتون ڏنيون ويون آهن. ايپل مطابق ان سهولت سبب جيڪڏهن ڪو صارف گاڏيءَ ۾ خرابيءَ سبب ڪنهن اهڙي جاءِ تي ڦاسي پوي ٿو جتي سگنل نه هجن ته هو ايپل جي سيٽلائٽ نظام کان مدد حاصل ڪري سگهندو ۽ ٻين صارفن سان پنهنجو پاڻ کي ڳنڍي سگهندو.
