ترقي پسند ۽ سُڌريل سماج جي اڏاوت لاءِ سٺين خوبين ۽ نيڪ گڻن جو دائرو تمام وسيع آهي، جن منجھان ڪجھ خاص خوبيون جيئن صبر، سهپ، همت، حوصلو، احسان، شفقت، رحمدلي، قناعت، سچائي، سادگي، نهٺائي، پاڪيزگي، بردباري، شرم ۽ حيا، ايمانداري، وقت جي پابندي، خلوص، تعاون، مددگاري اعتبار، پيار، پرهيزگاري، نياز ۽ نوڙت، حب الوطني، غيرت، فرض شناسي، امن پسندي، قرباني، مهمان نوازي، نيڪ نيتي ۽ علميت جهڙيون خوبيون، گُڻ ۽ صلاحيتون، سماج جي سڀني فردن سميت، مڙني شعبن ۽ ادارن ۾ ڪم ڪندڙ هر ماڻهوءَ ۾ هجڻ ضروري امر آهن. مطلب هر چڱو گڻ انساني عظمت جو اهڃاڻ آهي، جنهن سان سماج جا قدر جڙن ٿا. اهڙن انساني قدرن ۾ تهذيبي ۽ ثقافتي قدر، اخلاقي ۽ معاشي قدر، مذهبي ۽ علمي قدر گڏجي شخصيت جي تعمير ڪن ٿا. اڳتي هلي فردن جا انفرادي عمل، اجتماعي ۽ سماجي تبديلين جو ڪارڻ ٿيندا آهن، جيڪي عمل انساني ترقيءَ جي قافلي کي اڳتي وٺي هلندا آهن، پر جڏهن اسان، سماج کي اڳتي ۽ گھڻو اڳتي، بلندين ڏانهن وٺي ويندڙ هستي استاد جي ڳالھ ڪنداسين ته ان ۾ سڀني خوبين هجڻ سان گڏ سندس شعبي جي حساب سان ۽ سماج ۾ رتبي ۽ ڪردار لاءِ جن گڻن ۽ خُوبين جو هجڻ ضروري ٿا سمجھون، سي ڪجھ خاص خُوبيون هي آهن: 1. شفقت 2. ڄاڻ جي مهارت 3. سخاوت 4. ترقي پسند سوچ 5. تنقيدي ۽ تخليقي سوچ 6. منصوبا سازي 7. عملي ڪردار جو نمونو 8. اثر وٺڻ نه پر اثر ڏيڻ جي صلاحيت 9. خيالن، سوچن، فڪرن ۽ نظرين بيان ڪرڻ جي شجاعت. هاڻي اچو ڏسون ته اهي خوبيون گڏجي ڪيئن هڪڙي سٺي ۽ صالح استاد جي رتبي ۽ ڪردار کي اعليٰ بڻائين ٿيون.
