حيدرآباد جي ماڊل ڪرمنل ٽرائل ڪورٽ ۾ ايڊيشنل اينڊ سيشن جج تصور حسين راجپوت ڊاڪٽر آڪاش انصاري قتل ڪيس ۾ فيصلو ڏيندي سندس هنج ورتل پٽ لطيف آڪاش کي موت جي سزا ٻڌائي ڇڏي. ياد رهي ته سنڌ جي نالي واري مزاحمتي شاعر ڊاڪٽر آڪاش انصاريءَ جو موت شارٽ سرڪٽ سبب باھ لڳڻ ڪري نه، پر ان کي بي رحميءَ سان قتل ڪرڻ بعد سندس ويڳي پٽ هٿ سان ساڙي ڪيو هو، جنهن جو هن پاڻ ذڪر ڪيو هو. آڪاش انصاريءَ جو پاليل پٽ پنهنجي پيءُ کي قتل ڪرڻ کانپوءِ گهران نڪري ڪيتري دير تائين هڪ واسطيدار وٽ وڃي ويٺو رهيو، جنهن کانپوءِ هن گهر اچي پيءُ جي مڙهه کي باھ ڏئي ساڙي مامري کي شارٽ سرڪٽ سبب پيش اچڻ جو رنگ ڏنو. پوليس فوري ڪاروائي ڪندي ڊاڪٽر آڪاش انصاريءَ جي قتل ۾ استعمال ٿيل ڇري هٿ ڪئي ۽ سندس پٽ لطيف پيءُ کي قتل ڪرڻ جو اعتراف به ڪيو هو، ايس ايس پي حيدرآباد فرخ لنجار واقعي بعد فوري طور گهُر ڪئي ته ڊاڪٽر جو پوسٽ مارٽم ٿيڻ گهُرجي، جنهن تي اعتراض ڪيو ويو، پر بعد ۾ پوسٽ مارٽم ڪرايو ويو. ايس ايس پي موجب پوسٽ مارٽم جي ابتدائي رپورٽ ۾ اهڙيون ڳالهيون سامهون آيون جنهن ۾ اندازو ٿيو ته ڊاڪٽر آڪاش انصاري جو موت شارٽ سرڪٽ سبب باھ لڳڻ سان نه ٿيو. پوسٽ مارٽم ۾ ظاهر ٿيو ته آڪاش انصاري جي جسم تي “ملٽيپل زخمن” جا نشان هئا. ڊاڪٽرن کان پڇا ڳاڇا ڪري واضح ڪيو ويو ته زخم شيشي جا ناهن. آڪاش انصاري جي ڦڦڙن ۾ دونهون نه مليو. ڇو ته دم گهٽجڻ سبب فوت ٿيڻ تي رت نه وهندو آھي. ان کان اڳ، آڪاش انصاريءَ جي مبينا طور قتل ٿيڻ جي شڪ ۾ حيدرآباد پوليس سندس پاليل پٽ ۽ ڊرائيور کي حراست ۾ ورتو هو. ايس ايس پي حيدرآباد موت کي حادثي يا قتل جي جاچ لاءِ پنج رڪني جاچ ڪاميٽي ٺاهي ھئي، جنهن جي سربراهي ايس ايس پي هيڊڪوارٽر مسعود اقبال ڪري رهيو هو. جڏهن ته جاچ ڪاميٽي ۾ ڊي ايس پي بلديا، ايس ايڇ او بلديا، ايس ايڇ او ڀٽائي نگر شامل هئا. جاچ ٽيم فرانزڪ ٽيم سان گڏ واقعي واري هنڌ تان سيمپل ورتا هئا ۽ پنهنجي نگرانيءَ ۾ پوسٽ مارٽم ڪرايو. جڏهن ته ايس ايس پي حيدرآباد پڻ واقعي واري هنڌ جو معائنو ڪيو هو. بعد ۾ واقعي جو ڪيس داخل ڪيو ويو.
