فرياديءَ جو اسان تي اعتماد ناهي رهيو : جسٽس اطهر من الله

اسلام آباد هاءِ ڪورٽ جي چيف جسٽس اطهر من الله چيو آهي ته 70 سالن کان لاڳو نظام ۾ سڌارا ۽ تبديلي ضروري آهن، ان نظام کي جادو جي لٺ سان تبديل نٿا ڪري سگهون. جسٽس اطهر من الله شاهراهه دستور وٽ اسلام آباد هاءِ ڪورٽ جي نئين عمارت ۾ عارضي قانوني سهولت مرڪز جو افتتاح ڪندي تقريب کي خطاب ڪندي چيو ته سستو ۽ تڪڙو انصاف نه ملندو ته عمارتون ڪابه اهميت نٿيون رکن، اسان جو وجود ئي فريادي لاءِ آهي، ڇا اسان تي فريادي جو اهڙو اعتماد آهي جيڪو هجڻ گهرجي؟ سندس چوڻ هو ته اسان تي فريادي جو اعتماد اهڙي نموني ناهي جيئن هئڻ گهرجي، سياسي قائد به فريادي جي اعتماد کي بحال ڪرڻ ۾ ڪردار ادا ڪن، اسان کي سائلين جو اعتماد کي بحال ڪرڻو آهي.