پاڪستان ۾ هونئن ته ڪرپشن جي نالي کان ٻچو ٻچو واقف آهي ۽ سڀني کي اها پروڙ هوندي آهي ته هتي هيٺان کان وٺي مٿي تائين ڪوبه اهڙو ادارو يا فرد ناهي جيڪو ڪرپشن کان پاڪ هجي. هيٺيون طبقو ته پنهنجي وت ۽ وس آهر ڪرپشن ڪري ٿو، پر مٿئين طبقي جا فرد ايتري ته ڪرپشن ڪن ٿا ته پيرن کان زمين ئي سرڪي وڃي ٿي. تازو مٿئين طبقي جي طرف کان فقط کنڊ ۾ ايتري ته ڪرپشن ٿي آهي جو معلوم ٿيڻ تي ڏندين آڱريون اچي ويون آهن. يعني تازو ملڪ جي اندر اندازي مطابق 23 لک ٽن 55 رپيا في ڪلو گرام جي حساب سان مهانگي ڪري وڪرو ڪئي وئي آهي. 7 لک ٽن ٻاهرين ملڪن کان گهرائڻ تي 83 ڪلو في ٽيڪس ڊيوٽي معاف ڪرائي وئي. وزيراعظم کي ڪنهن آفيسر يا وزير گمراھ ڪيو؟ ان جو ڪير ذميوار آهي؟ نه ته ڪا تحقيق ٿي، نه ڪا انڪوائري ٿي، پر جڏهن جاچ ٿي ته عوام جو رت 90 ارب نپوڙڻ واري مافيا ۾ ڪير ڪير ملوث آهن ته پتو پيو ته اهي خاندان آهن جيڪي ستر سالن کان عوام جي رت ۽ پگهر تي پلجندا اچن ٿا. پاڪستان ۾ اٽڪل 72 شگر ملون فعال آهن، جيڪي سڄي ملڪ ۾ پنجاب، سنڌ، خيبر پختونخواهه ۽ بلوچستان ۾ پکڙيل آهن، پر پنجاب ۽ سنڌ ۾ ٻين ٻن صوبن جي ڀيٽ ۾ وڌيڪ شگر ملون آهن. جڏهن ته خيبر پختونخواھ ۽ بلوچستان ۾ ڪجهه شگر ملون آهن، شگر ملن جا مالڪ جيڪي پنهنجين ملن کي سبسڊي يا برآمدي سهولتن جي وسيلي وڌ کان وڌ فائدو رسائين ٿا. ڪو وقت اهي ملن جا مالڪ کنڊ جي قيمتن ۾ هٿرادو واڌ ڪري به ڪروڙين رپيا ڪمائين ٿا.
